Dragon Quest-actionspel kjem til Europa

Men PlayStation 3-versjonen blir igjen i Japan.

Square Enix har i dag kunngjort at det neste spelet i den mangeårige Dragon Quest-serien får lansering i Europa til hausten. Dette er ikkje eit tradisjonelt Dragon Quest-spel, men i staden eit samarbeid med Dynasty Warriors-utviklarane Omega Force, og det har fått namnet Dragon Quest Heroes.

Dragon Quest Heroes har mykje til felles med Dynasty Warriors-serien. Du vel deg ein helt, og spring rundt i store område der du susar gjennom eit hav av fiendar som ein snøplog gjennom tørr snø. Spelet blir snart lansert til både PlayStation 3 og PlayStation 4 i Japan, men i Europa vil berre PlayStation 4-versjonen sjå lansering. Lanseringa vil finne stad i år, utan at vi har fått noko nærare tidspunkt.

Første Dragon Quest på mange år

Skjermbilete frå den japanske versjonen av Dragon Quest Heroes.
Skjermbilete frå den japanske versjonen av Dragon Quest Heroes.

Spelet er laga i samarbeid med skaparane av Dragon Quest-serien, og vil la deg velje mange ulike heltar frå seriens historie. Dette blir samtidig det første nye Dragon Quest-spelet som kjem til Europa sidan Dragon Quest IX frå 2010. Sidan då har vi likevel fått nokre mobilversjonar av eldre spel i serien.

Dragon Quest Heroes er ikkje det første spelet Omega Force lagar basert på kjende spelseriar. I fjor haust lanserte dei Hyrule Warriors. Det spelet ligg òg i Dynasty Warriors-gata, men gjekk føre seg i The Legend of Zelda-universet, og vi fekk spele som ei rekke kjende figurar frå den serien. Jens Erik var derimot ikkje heilt imponert:

«Ideen er absolutt god. Det er ingenting som tilseier at et Dynasty Warriors-spel ikledd Zelda-drakt ikkje kan fungere. I byrjinga med var også Hyrule Warriors overraskande underhaldande. Spelet hadde ei leikenheit ved seg som dei nyare konsollutgåvene av Zelda-serien har mangla, og det såg aldri ut til å ta seg sjølv spesielt alvorleg. Sjølvironien til tross kjentest det som om spelet gjekk tom for damp etter berre få timar.»

Om du vil ta ein tur innom Dragon Quest-universet før Dragon Quest Heroes lanserast seinare i år, er Dragon Quest VIII eit veldig godt val. Det fekk i fjor lansering på iOS og Android.

Kommentarer (6)

Forsiden akkurat nå

Til toppen