Insektslakt til Vita

Earth Defense Force 2017 Portable kjem til Europa.

Det er gode tider for alle som hatar insekt. Under Tokyo Game Show blei eit flunkande nytt spel i den absurde Earth Defense Force-serien kunngjort for PlayStation 3 og Xbox 360. Det er derimot ikkje alt insekthatarane har i vente. Xbox 360-kultklassikaren Earth Defense Force 2017 er på veg til PS Vita, og no har D3 Publishing via den offisielle Twitter-kanalen kunngjort at spelet kjem til Europa.

Skulle Earth Defense Force vere ukjent i verda di er det grunnleggjande konseptet såre enkelt. Plukk opp to våpen, spring ut i byen, skyt alt du ser, og om ein einaste bygning står igjen når alle insekta er døde, har du feila.

Skjermbilete frå Earth Defense Force 2017 til Xbox 360.
Skjermbilete frå Earth Defense Force 2017 til Xbox 360.

Serien er kjend for å på ingen måte ta noko som helst seriøst. Verda blir invadert av insekt store som dinosaurar og robotar som konkurrerer mot Godzilla i omfang. Rammeverket er deretter. Håplaust pretensiøs dialog prøvar å få fram dramatikken, og den skrullete fysikken får dei massive insektbeista til å fly kilometervis av garde medan bileteoppdateringa kryp ned i einsiffra tal.

PS Vita-versjonen kjem med ei rekke nye element som bør freiste erfarne Earth Defense Force-veteranar. Der du i Xbox 360-versjonen berre kunne spele saman med ein ven over delt skjerm, kan no fire spelarar slå seg saman mot insekta over internet.

I tillegg kjem Earth Defense Force 2017 Portable med fleire nye oppdrag, og moglegheita for å ta på deg rolla som den flygande soldaten Pale Wing.

Earth Defense Force 2017 Portable blir tilgjengeleg tidleg neste år.

Les også: Samarbeid mot insektene

Kommentarer (1)

Forsiden akkurat nå

Til toppen