Japanske utviklarar har sakte, men sikkert oppdaga moglegheitene ved folkefinansiering. Blant dei første japanarane som kasta seg på Kickstarter fann vi Keiji Inafune, og hans Comcept-studio. Dei ville lage ein andeleg oppfølgjar til Mega Man – ein serie Inafune sjølv var med på å skape – og lukkast stort med det.
Inafune bad om 900 000 dollar for å få finansiert spelet, og enda inn med å bli ein av dei verkeleg store Kickstarter-suksessane. Ved kampanjens slutt hadde Inafune og teamet hans sanka inn over 3,8 millionar dollar.
Blir filmatisert
Eit heilt nytt spel er kanskje ikkje det tryggaste prosjektet å satse på om ein skal lage film, men Mighty no. 9 ser ut til å bli nettopp det. Via Polygon får vi vite at Tim Carter frå Contradiction Films – produksjonsselskapet bak Machinima-serien Mortal Kombat: Legacy – fortalde til EP Live at selskapet hans er i ferd med å filmatisere Mighty no. 9.
Nøyaktig kva form prosjektet vil ta er ikkje heilt tydeleg. Med tanke på den teikneserieaktige stilen til Mighty no. 9 vil det vere naturleg å tru at det vil bli ein animert film eller serie, men Carter brukar uttrykket «live action», noko som stort sett betyr at vi får sjå skodespelarar i staden for animerte figurar.
Carter var i utgangspunktet tvilande til korleis spelet ville fungere for det Nord-Amerikanske publikummet, men Infaunes tankar om prosjektet skal ha fjerna all tvil.
Om Mighty no. 9 blir film eller serie, og korleis det ferdige produktet blir gjort tilgjengeleg for massane er ikkje klart enno.
Om du lurer på korleis det går med andre Kickstarter-prosjekt kan du lese deg opp på kva vi meinte om Terraria-inspirerte Starbound i vår sniktitt.
