Torsdag la prosessorprodusenten Intel fram tala sine for tredje kvartal. Kort sagt har Intel opplevd konsekvensane av at det er vanskeleg å få tak i halvleiarar, og dei klarar difor ikkje produsere nok til å møte etterspurnaden etter produkta deira.
PC-delen av produksjonen deira minska omsetninga med rundt to prosent samanlikna med i fjor, som gjorde at Intel fekk eit børsfall på heile åtte prosent i går.
Auka produksjonskø på halvleiarar har ført til nedgang i ei rekkje ulike bransjar. Alt frå bilproduksjon til skjermkortproduksjon har møtt betydelege flaskehalsar i utviklinga si.
For oss forbrukarane betyr det at det til dømes blir færre bilar, skjermkort og prosessorar i butikkane. Mindre produksjon gjer òg at etterspurnaden går opp, som resulterer i ein negativ spiral der ventetidene blir lengre og lengre.
Lang ventetid
Gamer.no kunne òg vise fram statistikk som skildra at prisane på skjermkort var på veg nedover her i Noreg, men nedgangen er såpass liten at det fort kan gå begge vegar.
– Me er i det verste no. For kvart kvartal neste år vil det bli stegvis betre, men me har nok ikkje balanse mellom tilbod og etterspurnad før i 2023, sa Gelsinger til CNBC.
Nærmar seg lansering
Det er venta at Intel skal dra sløret av ein ny generasjon av gamingprosessorar 27. oktober, altså neste veke.
I løpet av den siste månaden har det vore ein jamn straum av lekkasjar og rykte om lanseringa, der siste nytt er at flaggskipet Intel Core i9-12900K kan få ein lanseringspris på 670 dollar i USA.
