Skjermkort med 8 GB videominne er ikkje spesielt godt rigga for framtida. Spel krev stadig meir videominne for å yte, men speler du berre Counter-Strike i 1080p, kan det kanskje spare deg for nokre kroner.
Det har både Nvidia og AMD tenkt med lanseringane av RTX 5060 Ti og RX 9060 XT.
Begge produkta kjem i versjonar med enten 8 GB eller 16 GB videominne. AMD lanserer sine RX 9060 XT 5. juni, og får no gjennomgå på sosiale medium om lanseringa.
AMDs Frank Azor skriv på X at «majoriteten» av spelarar framleis speler i 1080p, og at dei derfor ikkje har bruk for meir enn 8 GB videominne.
– Dei mest spelte spela, verda rundt, er e-sportspel. Me ville ikkje laga det om det ikkje var ein marknad for det, skriv Azor.
Det at begge versjonane, altså både den med 8 GB og 16 GB videominne, har same namn, møter kritikk.
AMD minner om at det er det same skjermkortet, men berre med ulikt videominne. Fleire av dei store testsidene meiner det lett kan forvirre forbrukarane.
