Chris Avellone har slutta i Obsidian Entertainment. Han har vore ei uhyre viktig brikke i utviklinga av dei fleste spela Obsidian har utvikla, såvel som klassiske rollespel frå Black Isle Studios.
Nyhenda kom via ei Twitter-melding frå Avellone. Mine Harry Potter-kunnskapar er så pass dårlege at den blir litt vanskeleg å oversette, men det ser ut til at Avellone no har fått seg ny stilling ved Hogwarts.
I have officially left Obsidian Entertainment to accept a sudden opening as the Defence Against the Dark Arts Professor at Hogwarts.
— Chris Avellone (@ChrisAvellone) June 9, 2015
Ukjend framtid
Kva Avellone vil ta seg til no som han ikkje lenger er hos Obsidian Entertainment har han til gode å seie noko om. Med ei solid merittliste bak seg vil han vere eit kupp for mange studio, om han vel å halde fram i spelindustrien.
Det førre spelet Avellone styrte i land var det svært solide rollespelet Pillars of Eternity. Dette nyleg lanserte rollespelet er eit kjærleiksbrev til dei gamle PC-rollespela frå 90-talet, og blei finansiert via Kickstarter.
Avellone har òg lånt sine talent til inXile under utviklinga av deira Kickstarter-finansierte rollespel Wasteland 2.
Blant eldre titlar Avellone har vore med på å skape finne vi klassikarar som Planescape: Torment, Fallout 2 og Star Wars: Knights of the Old Republic 2.
