Lanseringa av Nvidia sin 50-serie har så langt blitt møtt med kritikk og frustrasjon. Mange reagerer på marknadsføringa til Nvidia, og i kjend stil er butikkane skåltomme for skjermkorta.
Det er flaggskipet RTX 5090 og entusiastkortet RTX 5080 som har leia an. No avslører Nvidia datoane for RTX 5070 Ti og RTX 5070.
Nvidia-toppsjefen samanlikna ytinga til sistnemnde med RTX 4090 under sin CES-konferanse. Det var med både KI-oppskalering og fleirbildegenerering, og har blitt latterleggjort på sosiale medium.
RTX 5070 Ti blir lansert 20. februar, mens RTX 5070 kjem 5. mars.
Ifølgje Nvidia får RTX 5070 ein startpris på 7969 kroner. RTX 5070 Ti kostar frå 10 859 kroner. Det er ei auke frå 40-serien.
Det er ikkje godt å seie kva butikkane faktisk kjem til å ta for korta.
Gamer.no ventar enno i spenning på at vårt RTX 5090 skal kome frå Nvidia, som av uforståelege grunnar har ein sperrefrist i slutten av neste veke.
AMD kjem også med sine første skjermkort i 90-serien. Dei gjekk ut med nokre få detaljar om AMD RX 9070 XT og RX 9070 under CES, men skal ha ein eigen lanseringskonferanse 28. februar.
Skjermkorta er forventa i butikkane i starten av mars, skriv AMD-representant David McAfee på X.
