– Salet har vore heilt enormt, seier kommunikasjonssjef Kristian Willanger i Elkjøp.
– Dette blir vår største konsollansering i vår historie, seier Mikael Kolding i Proshop.
– Dette har nok vore ein av våre mest suksessrike lanseringar på ei stund, seier Daniel Hauan i Komplett.
– Det er ei lansering som verkeleg engasjerer folk, seier Silje Ensrud i Power.
Lang ventetid?
5. juni dukkar Nintendo Switch 2 opp i norske butikkhyller. Dei store, norske nettbutikkane har hatt ein enorm pågang.
Førehandsbestillingane har tikka inn sidan lansering, men det er enno ikkje kjend kor mange konsollar Nintendo faktisk har seld.
Hos ProShop spår dei altså rekord.
– Alle konsollar som kjem på lager dag éin, er selde. Neste sending kjem 17. juli, opplyser marknadssjef Mikael Kolding.
Han fortel at det er pakken med Mario Kart World som dei får flest av, og at det også er den kundane vil ha.
Proshop har god dialog med Nintendo-leverandør Bergsala, fortel han.
– Me har fått veldig mange konsollar. Me får mange spel og tilbehøyr, og det heile har seld svært godt, seier han.
Inviterer til fest
Elkjøp markerer lanseringa med lanseringsfest på Elkjøp Lørenskog og Elkjøp Glassmagasinet (i Oslo).
I Lørenskog riggar dei heile butikken til Switch 2-lanseringa.
– Me har seld fleire tusen Switch 2 sidan første dag. Det er tydeleg at folk har venta på og gleder seg når det endeleg kjem ein ny konsoll frå Nintendo, seier kommunikasjonssjef Kristian Willanger.
Dei arbeidar no med å fylle opp hyllene sine, landet rundt.
– Det er framleis mogleg å førehandsbestille, men no ser det ut til at folk ventar til dei kan handle i butikk.
Willanger fortel at salet startar klokka 10 på torsdag.
– Me forventar stor pågang. Me har sørga for godt med varer, og håper alle som vil sikre seg ein Switch 2 får moglegheita.
Førehandsbestillingane blir send ut slik at folk får konsollen på lanseringsdagen eller rett etter.
– Når det gjeld spel, er det klassikarane som regjerer, seier Willanger.
Han seier det er Mario Kart World, Donkey Kong Bananza og Breath of The Wild som sel mest av spela.
Heftige tal
Switch 2 med Mario Kart World-pakken er også det som går mest hos Power.
– Det skuldast nok i stor grad at Mario Kart er eit av dei mest populære spela gjennom tidene, og når det følger med i ein pakke, får kundane mykje for pengane, meiner kommunikasjonssjef Silje Ensrud.
Hos dei er det også Donkey Kong og The Legend of Zelda som ligg hakk i hæl i sal av spel.
– Førehandssalet av Switch 2 har gått fantastisk bra. Me er meir enn fornøgde så langt, seier Ensrud.
Dei ser stort engasjement rundt lanseringa.
– Aktivitetane i våre kanalar er høgare enn det me opplevde ved lanseringa av den første Switch-konsollen. Me har også allereie dobla antalet førehandsbestillingar av Switch 2 samanlikna med salet me hadde av Switch 1 i heile lanseringsmånaden av lanseringa, seier Ensrud.
– Veldig gledeleg
Komplett har fått fleire bestillingar av Switch 2 enn dei forventa.
– Det er sjølvsagt veldig gledeleg for oss. Om ein ser tilbake, er det kanskje ikkje så rart, med tanke på at det er lenge sidan det har kome noko nytt frå Nintendo, seier kommunikasjonssjef Daniel Hauan.
Dei har ikkje fått noko informasjon om tilgang på eksemplar utover sommaren.
– Det beste tipset vårt er å melde seg på «motta varsel» på konsollen, så vil ein få e-post så fort vara er på lager, seier Hauan.
