Det er ikkje så ofte me får teste duppedittar frå heilt nye selskap, og i alle fall ikkje frå Skandinavia. No har NetOnNet gått saman med den svenske Counter-Strike-profilen Emil «HeatoN» Christensen for å utvikle eit eige gamingmerke med mus, tastatur, headsett og musematter for e-sport.
Me tar høvet til å teste litt av kvart i ein samletest frå det nye merket ZON – Home of Victory.
Gamer.no har hatt ZON mouse2, headset1 og keyboard1 på pulten i nokre veker no. Det er kanskje ikkje dei mest kreative namna, men NetOnNet leverer på konkurransen mot til dømes Komplett sitt merke Svive.
Produkta er basert på nokolunde ferdige design, som betyr at NetOnNet har bestilt dei som eit slags halvfabrikat og deretter gjort endringar i samband med «HeatoN» etter testing. Eg anar ikkje korleis profittmarginane er på denne typen produkt, men me skal lage ein eigen artikkel som ser nærmare på korleis det fungerer.
Me bryner oss på headsettet først.
Overraskande bra headsett
ZON headset1 er eit komfortabelt og relativt tungt headsett med ein lang USB-kabel til 1200 kroner.
Det er relativt anonymt for gamingheadsett å vere, og eg likar designet. Metallkonstruksjonen sikrar òg at det toler ein støyt eller to.
Lærputene er behagelege mot øyret mitt, men headsettet sit dessverre veldig laust mot hovudet mitt. Det gjeld spesielt bak øyrene. Bøyelen har veldig mykje fleks, og det er mogleg å stille det til for langt større hovud enn mine, men med mitt mellomstore hovud burde kanskje den minste innstillinga vore mindre enn han er.
Lydkvaliteten er betre enn eg hadde venta, og det er rikeleg med guff i drivarane til å spele øyredøyvande høgt. Lydbiletet er ein smule flatt, men du får med ein EQ på 10 band i programvara for å gjere opp for det. Ved å løfte bassen litt blir det mykje betre. Eit tips er å halde deg unna dei heilt komisk dårlege førehandsinnstillingane på EQen som myrdar alt av lydkvalitet.
7.1-modusen er òg langt betre enn eg forventa. Han er balansert nok til at du framleis kan høyre på musikk, sjølv om høgtonane druknar litt med den på. Du kan til og med justere kvar alle dei virtuelle høgtalarelementa skal vere i forhold til øyra dine. Det er rein gimmick, men ganske kult.
Mikrofon held òg god kvalitet med tanke på prisen. Han spelar høgt og leverer stemma mi utan noko særleg forvrenging. Dessverre klarar han ikkje reprodusere høgtonane nøyaktig nok, og det er litt støy på fullt volum, men dette er ikkje noko stort problem.
Du kan høyre ein test av mikrofonen her.
Alt i alt er dette ein lovande start frå svenske ZON. Problemet deira er at det er svært mange gode headsett i dette prissegmentet, og merke som HyperX, Razer, Logitech og SteelSeries slår dei på både lydkvalitet og komfort. ZON headset1 er eit bra produkt, men eg ser ikkje heilt korleis det skal bli ein salgssuksess når andre gir endå meir for pengane.
Zowie-kopi
ZON lanserer to ulike ergonomiske gamingmus blant dei første produkta sine, og me har fått teste mouse2. Dette er i praksis ein kopi av Zowie sin EC-serie. Det var faktisk «HeatoN» som først laga passforma til EC-serien, så det må vere innanfor, men det er nokre ting som skurrar her.
Passforma er legendarisk, og er framleis ei av dei beste til skytespel. Samstundes lid produktet av å henge litt etter i ein marknad med ekstremt hard konkurranse. Med sine 96 gram veg ho langt meir enn mange av dei andre kopiane av denne passforma. Den fletta kabelen burde vore laga av tøy, og museføtene er ikkje fullt så glatte som eg ville likt. Slik skal det ikkje vere på ei kabelmus til 800 kroner.
Musa skil seg frå inspirasjonskjelda blant anna ved å ha ein eigen «sniperknapp» mellom sideknappane. Den og sideknappane er klart nok definerte til at eg ikkje kjem borti knappen ved uhell, men sideknappane har for lang vandring og altfor mjuk tilbakemelding.
Greie RGB-lys, ein PMW3389-sensor, eigen knapp for PPT-trinn og oppdateringsfrekvens på undersida og ulike trinn for løftedistanse hjelper musa opp mot Zowie sine originalar, men eg ser ikkje kvifor eg skal kjøpe denne i staden for ein av dei mange andre EC-klonene som finst. Sjølv om det isolert sett er ei god gamingmus, må prisen kuttast betydeleg for at denne skal bli konkurransedyktig.
Enkelt tastatur
ZON har førebels to ulike tastatur, og me har testa det som kjem i fullformat. Overflata i aluminium gjer at det tar seg bra ut på pulten min, samstundes som byggekvaliteten verkar solid.
Handleddsstøtta gir heilt grei komfort takka vere eit lite gummibelegg oppå plasten, og ein lur låsemekanisme gjer at ho ikkje rikkar seg i bruk. Men støtta ville nok vore betre om ho var litt breiare.
Glatte tastehetter gjer at tastaturet er behageleg i bruk, sjølv om dei lineære Kailh Red-brytarane ikkje er dei beste til å skrive med. Dette er laga for fart og gaming. Legg du like mykje vekt på skriveopplevinga som spelinga ville eg ha gått for andre brytarar, men ein venner seg til å skrive på desse etter kvart òg. Til konkurransespeling er dei ypparlege.
Det er heile 14 ulike RGB-modusar i programvara, og lyselementa har respektabel styrke. Programvara er elles svært grunnleggjande, men du får nokre ulike profilar og ein funksjon for å programmere makro.
Tastaturet sin store veikskap er mangel på alt mogleg ekstrautstyr, slik som dedikerte medieknappar, rullehjul for volum og dedikerte makroknappar. Ein klarar seg sjølvsagt fint med snarvegane i dei eksisterande tastane, men igjen er pris ein viktig faktor, og det er fleire andre mekaniske tastatur i denne prisklassen som byr på fleire funksjonar enn dette gjer.
