Det er ikkje til å legge under ein stol at spelindustrien har vore eit mannsdominert miljø frå starten. Det finnest naturlegvis viktige kvinner i bransjen, som til dømes The Sims-sjef Lucy Bradshaw frå EA, og Gabriel Knight-skapar Jane Jensen, men dei er like fullt for unntak å rekne.
Dette meiner derimot Gary Carr frå Fable-utviklarane Lionhead vil endre seg. Han har snakka med OXM om situasjonen, og har følgjande å seie om situasjonen akkurat no:
«Finnest det ikkje ein statistikk som seier at 55 % av spelarane er jenter? Eg trur handhaldne maskiner og ting som Nintendo DS er veldig tilgjengelege og jenter kanskje blir tiltrekte av marknaden meir no enn i vår tid. Då var det enten ein konsoll eller Amiga eller noko slikt.»
Ti år igjen
Vidare fortel han at dei no er i ferd med å få den variasjonen dei vil ha i staben sin, sidan fleire av søkarane no er kvinner. Han fortel òg at han ikkje vil sitje i eit studio med berre mannfolk:
«Eg vil ikkje berre ha menn som lagar spel for menn, eg vil ha menn og kvinner som lagar spel for menn og kvinner. Det må reflekterast i arbeidskrafta, og det er i ferd med å skje. Om fem til ti år trur eg situasjonen vil vere omlag 50-50.»
Kvinnene sin plass i spelindustrien har framleis eit godt stykke igjen. Under utviklinga av storspelet The Last of Us måtte til dømes Naughty Dog insistere på å få bruke kvinnelege testarar sidan slike jobbar stort sett går til menn.
Les også: Microsoft avduker Fable Legends Les også: Sniktitt: Beyond: Two Souls
