– Det var ein evig kamp.
Jon Cato Lorentzen er ein av norsk presses mest erfarne speljournalistar, og tok i 2008 over som sjefredaktør for Gamereactor Norge.
Gamer.no har den siste veka sett på arbeidsforholda i det tradisjonsrike og multinasjonale spelmagasinet. To tidlegare redaktørar har fortald om frustrasjonen ved å bli overkøyrt av eigarane sine.
Lorentzen kom inn i ein periode der magasinet ville satse.
Finanskrisen skulle snart legge ein liten dempar på optimismen, men Lorentzen stilte ei rekkje krav før han tok over jobben.
– Det gjekk ganske bra i starten, men så blei det verre og verre, seier han.
LES OGSÅ: Fekk kjeft av sjefen på 23. desember »
– Sterkt og veksande ubehag
Lorentzen kravde blant anna eige kontor, honorar til skribentane, respekt for Redaktørplakaten og at magasinet skulle følge norsk presseetikk.
– Eigarane var interesserte i å rette opp i ein del ting. Men danskane prøver å framstille Gamereactor som eit produkt med mest mogleg verdi, utan interesse for å bygge opp verdien på innsida og eit godt miljø, meiner han.
På den tida var papirmagasinet flaggskipet i satsinga til Gamereactor.
Han og kollega Carl Thomas Aarum la sjela i å levere det beste produktet dei kunne lage, og det var også der konfliktane starta.
Finanskrisen gjorde at Gamereactor måtte stramme inn. Det blei aldri noko av lovnaden om honorar til frilansskribentane.
– Eg følte på eit sterkt og veksande ubehag av å skulle utnytte gratis arbeidskraft, seier Lorentzen.
Har du tips til denne saka? Kontakt meg gjerne på [email protected]
Kjeppar i hjula?
I 2008 hadde Gamereactor magasin i Noreg, Sverige, Danmark og Finland. Lorentzen fortel at dei nordiske redaktørane blei ein slags opposisjon mot eigarane.
– Etter kvart utvida dei til England og Tyskland. Redaktørane der var meir servile og kunne jobbe for ein slikk og ingenting og produsere enormt med innhald, hevdar Lorentzen.
Som redaktøren ville han levere frå seg eit godt papirmagasin. Det var trass alt hans namn som stod på det.
– Mange sat pris på å ha eit magasin dei kunne plukka opp i spelbutikkane, og me var klare på alt innhaldet skulle vere norsk. Me laga alle artiklane sjølv.
Målet var å bygge eit norsk samfunn av spelarar rundt, men han opplevde at nye krav frå eigarane stakk kjeppar i hjula for visjonen.
– Danskane kunne plutseleg sende annonsekampanjar som inkluderte redaksjonell dekning. Eg måtte true med å seie opp, me krangla og gjorde rotne kompromiss, seier Lorentzen.
LES OGSÅ: Eigarane sletta Eiriks avskjedsbrev »
– Harde bod
– I periodar krangla me relativt ofte. Det kunne vere om alt frå spelkarakterar til at den danske merkesjefen skulle ha omtale av sykkeldekk inn i magasinet som han hadde fått av leverandør.
– Det var nokre idiotiske diskusjonar.
Karakterane i testar blei også eit tema i tvistane.
– Viss eit spel hadde fått 8/10 i Gamereactor Sverige og me gav det 5/10, ville dei gjerne at me trekte vår omtale og heller omsetje og publiserte den svenske, seier Lorentzen.
Det ville han ikkje finne seg i.
– Eg sa vel opp fire-fem gongar fordi dei danske eigarane overstyrte ting eg gjorde. Så trekte dei seg, så trekte eg oppseiinga mi igjen. Det var harde bod.
– Låg i korta
Dei tidlegare redaktørane Eirik Furu og Suzanne Berget har fortald om høge leveringskrav og låg løn.
– Me skulle levere ti saker til dagen, men det var ingen som sat og talde. Det var ikkje ei slik detaljstyring på den tida, seier Lorentzen.
Han hadde høgare løn enn dei begge ti år tidlegare. Årsløna var på rundt 350.000 kroner, og Lorentzen fekk også lov til å frilanse for andre i same slengen.
Dei stadige kampane med eigarane sleit han ut.
– Produktet blei dårlegare og dårlegare, det blei konflikt etter konflikt og det låg i korta at me kom til å miste kontora våre, seier han om bakteppet for at han sa opp.
Mangelen på honorar til frilansarar kom på toppen, og nedprioritering av papirmagasinet gjorde det endå mindre attraktivt.
– Eg fekk til slutt ei moglegheit hos Spill.no. Eg fekk dobla løna og langt betre arbeidsforhold, seier han.
Lorentzen var redaktør for Gamereactor Norge til 2010.
Gamer.no har presentert dei danske eigarane for kritikken og har stilt dei fleire spørsmål om Gamereactor.
Dei har ikkje svara.
