– Jobben var ekstremt dårleg betalt. Arbeidsoppgåvene begynte å bli fleire og fleire, og presset frå eigarane blei verre og verre, seier Suzanne Berget.
Frå 2017 til og med 2019 var ho sjefredaktør i Gamereactor Norge.
– Eigarane la enormt mange føringar på kva me skulle skrive. Spesielt i kampanjeperiodar ville dei bestemme kven me skreiv om, seier Berget.
Gamereactor svarar i slutten av artikkelen.
Omfattande krav
Gamer.no skreiv nyleg om sjefredaktør Eirik Furu sitt oppgjer med Gamereactor Norges danske eigarar.
Han delte opplevingane sine rundt heftig arbeidsbelastning og eit heller kjedeleg samarbeidsklima, men Berget meiner Furu var for beskjeden i sin kritikk.
Med ei månadsløn på 25.000 kroner før skatt skulle ho og kollega Eirik Hyldbakk Furu få ut 15–18 nyheiter kvar dag, fortel ho.
Arbeidet bestod både av å lage eigne nyheiter og å omsetje artiklar frå andre Gamereactor-sider.
– Det kvoten var det berre eg og Eirik som stod for. Eg jobba fulltid, han jobba 50 prosent. Då eg begynte som skribent i 2013, gjorde tre fulltidsstillingar like mykje, hevdar Berget.
Arbeidet inkluderte minst éi større sak kvar dag i form av kronikkar, speltestar eller liknande.
– Ein gong i blant fekk eg vere redaktør for tekstar frå frilansarar, men i all hovudsak var jobben å tjørne ut innhald åtte timar i strekk – og ofte meir enn det. Me jobba både helger og feriar.
– Lett å bli utnytta
– Det er lett å bli utnytta i denne bransjen. Danskane skor seg på at du er lidenskapeleg opptatt av det du driv med, så tenkjer du kanskje ikkje over at du jobbar ekstremt mykje for frykteleg lite pengar, seier ho.
Kritikken kom raskt dersom dei ikkje publiserte nok.
Ho har ikkje lenger tilgang til e-posten sin i Gamereactor, men har lagra nokre skjermdumpar:
«Vi havde dårlig trafik i Norge i går og samtidig ser jeg at der kun er blevet lavet 13 nyheder. Det er 2–3 timers arbejde MAX? Det koster os og er altså ikke godt nok», skriv Claus Reichel i ein e-post.
Han stiller deretter ei rekkje spørsmål til skribentane om kva arbeid dei har gjort.
Berget meiner det blei spesielt krevjande om ho eller Furu blei sjukmelde, og hevdar at Reichel-brørne framleis forventa å få same produksjon.
– Då måtte Eirik gjere arbeidet om eg blei sjuk, seier ho.
– WAKE UP ASAP
– Gårsdagen var ærleg talt eit rot. Det var fint med to tekstar, men trafikken er driven av nyheiter, og sju nyheitsartiklar er ikkje ein gong halvparten av minimumskravet. Venlegast prøv å ha full dekning i dag, elles vil me måtte finne nokon andre som kan erstatte Suzanne når ho er sjuk eller på ferie. Nettsida lid betydeleg av dette, skriv ein person i selskapet.
Berget hugsar godt kva som blei den siste dropa.
Ho og Furu hadde jobba hardt gjennom 2018 for å produsere kvalitetsinnhald, og meiner dei strekte seg langt utover det forventa.
Ho ramsar opp deltaking på VGTV, God Morgen Norge, TV 2 Nyhetskanalen, gjesteforedrag, podkastar, gjesteforelesingar og spellanseringar.
– Alt gjorde me på fritida vår, og kostnadane kom av eiga lomme. Eg hugsar me hadde preppa masse tekstar inn mot jula.
På veslejulaftan kom e-posten med tittelen «WAKE UP ASAP – SIMPLY NOT GOOD ENOUGH!!!!!!» frå Morten Reichel.
– Lusen måte
«First news poster – 00.13 – then 8.30, the 9.00 – then 17.19. NOTHING during the day – TELL ME – Will this lead to traffic with no updates during ALL DAY – ALL evening? This is WAY WAY WAY to bad – what is going on???? And what about Facebook? From 22nd dec – 31st of DEC I have so many campaign – you need to wake up NOW!!!»
Då bestemte Berget seg for å slutte i jobben.
– Dei hadde ein rimeleg lusen måte å kommunisere med oss på. Me fekk som regel berre kjeft, spørsmål om kvifor me gjorde så dårleg jobb og beskjedar om å bli flinkare, hevdar ho.
I etterkant er ho også sterkt kritisk til Gamereactors samanblanding av redaksjonelle og kommersielle interesser.
– Eg trur ikkje danskane veit kva Ver varsam-plakaten er for noko. Dei brydde seg ikkje så lenge me publiserte nok, og me ikkje publiserte noko som kunne tolkast som krenkande mot Gamereactor eller utgivarane me samarbeidde mest med. Viss me publiserte noko som var kritisk, var dei raskt på ballen for å lese gjennom, seier ho.
– Føltes som me skreiv reklame
– Skjedde det at noko blei trekt tilbake?
– Det kan eg ikkje hugse, men eg opplevde ei generell haldning om å ikkje vere for kritisk.
– Gjaldt det også spelkritikk?
– Ja. Det blei lagt føringar på kva karakterar som kunne settast.
Furu har tidlegare fortald om korleis redaktørane måtte skrive både redaksjonelt innhald og sponsa innhald, som bryt med norsk presseetikk.
Berget meiner det blødde over i det redaksjonelle.
– Spesielt testar av maskinvare verka meir og meir sponsa. Det føltes som me skreiv reklame, ikkje faktiske testar.
Tok ned kritikk
Furu publiserte eit avskjedsbrev då han slutta 30. juni. Det sletta eigarane.
Berget delte sin frustrasjon gjennom fleire innlegg på X i 2019, men valde sjølv å fjerne dei etter ei rekkje telefonar frå eigarane.
– Dei ringde meg utan stopp i fleire dagar, seier ho.
Gamereactor Norge er organisert gjennom selskapet Gamez Publishing NUF.
Heile selskapet omsette for 10,1 millionar kroner i 2024, og ifølgje årsrekneskapen hadde Gamereactor Norge ei omsetning på i underkant av 500.000 kroner.
– Misvisande bilde
Gamereactor er presentert for alle påstandane i saka.
Claus Reichel skriv i ein e-post at dei ikkje kommenterer forhold rundt tilsette av omsyn til personvern og lojalitetsplikt.
– På generelt grunnlag vil me likevel presisere at fleire av premissa i saka gir eit misvisande bilde. Gamereactor produserer hovuddelen av innhaldet sentralt på engelsk, som deretter omsetjast og tilpassast lokalt, skriv Reichel.
Dei lokale redaktørane lagar ikkje alt innhaldet sjølv, påpeikar han.
– Når me har måtte avslutte arbeidsforhold, har det vore grunna i økonomiske forhold eller omstrukturering i ein bransje som er inne i ein krevjande periode, skriv han.
